- CLUB DEI POETI DIALETTALI DEL LEGNAGHESE
- Fondato da Sante Zamboni nel 1979
- Presidente Franca Isolan Ramazzotto
- I CANTI DEL CORE
- POESIE
- 10 Aprile 2010
- nel Teatro Mignon di Porto di Legnago
- Serata in onore di
- SILVIO TEDESCO
- Presentato dalla Prof.ssa IVANA STOPAZZOLO
- 1997-1998 Comitato formato da:
- Bruno Zanatta
- Nando Caltran
- Franca Isolan Ramazzotto
- Dal 1999 al 2008 Presidente: Franca Isolan Ramazzotto
- 1999-2000-2001 Consiglieri:
- Dino Barbieri
- Franca Bovolon
- Albino Calonego
- Sergio Polo
- Pasqualina Marin
- 2002-2003 Consiglieri:
- Dino Barbieri
- Ida Benedetti
- Franca Bovolon
- Albino Calonego
- Sergio Polo
- 2002-2004 Idem più Giovanni Boninsegna
- 2004-2006 Idem più Fiorello Stopazzolo
- 2006-2008 Idem
- 2008-2009 Idem più Nicola Chinaglia Pasqualina Marin
- 2009-2010 Consiglieri:
- Dino Barbieri
- Franca Bovolon
- Sergio Polo
- Giovanni Boninsegna
- Pasqualina Marin
- Tesoriere: Nicola Chinaglia.
- ALBO D’ORO DEL CLUB
- Serate tenute a Porto di Legnago
- Anno - Poeti ospiti d’onore o festeggiati.
- 1979 - Ospiti Poeti Veronesi
- 1980 - Ospiti Poeti Veronesi e Legnaghesi
- 1981 - Bruno Tosi +
- 1982 - Angiolo Poli +
- 1983 - Attaro Zamperioli +
- 1984 - Giovanni Bronzato +
- 1985 - Gianpaolo Feriani
- 1986 - Dino Coltro + dec. 2009
- 1987 - Dino Limoni +
- 1988 - Olga Ghirlanda +
- 1989 - Ermanno Bianchini +
- 1990 - Sante Zamboni
- 1991 - Alfredo Tognetti +
- 1992 - Lino Ramarro +
- 1993 - Nando Caltran
- 1994 - Ermete Vaccari +
- 1995 - Romana Menegazzi Stragapede
- 1996 - Luciano Rossi
- 1997 - Franca Isolan Ramazzotto
- 1999 - Franca Bovolon
- 2000 - Nerino Tognon e commemorazione
- del Musicista Legnaghese Antonio Salieri +
- 2001 - Alfonso Belluzzo
- 2002 - Pasqualina Marin
- 2003 - Fernando Rossi + dec. 2008
- 2004 - Mites Parladore
- 2005 - Otello Lonardi
- 2006 - Giovanni Rocco Mastella
- 2007 - Achille Frameglia
- 2008 - Dino Barbieri
- 2009 - Licia Pesente
- 2010- Silvio Tedesco
- ON INCONTRO
- ‘Na butelota
- gò incontrà…
- belòcia, infagotà.
- No l’èra elegante,
- forse no la gavéa
- gnanca le mudande.
- No ghemo parlà,
- ma se tegnéeno
- streti incolà…
- L’è stà un colpo
- de fulmine
- che n’à incendià.
- M’è cascà la man,
- la finisse proprio là…
- de colpo l’ò ritirà.
- Ghe domando: “ t’èto ‘rabià?”
- Ma nò, làssela là,
- tanto, gh’è tuto de usà!!!
- DINO BARBIERI, LEGNAGO
- GRANDE AMICA
- A son vecioto, mah…
- jèro inamorà
- come un buteloto.
- Me la toléa in brazzo,
- la ‘carezzava,
- la basava.
- Descondon
- anca in leto me l’ò portà
- e quanto gh’emo zugà.
- On giorno me mojèra
- la n’à catà
- ‘rabià la n’à crià.
- “L’èto almanco lavà?
- No te senti che spuzza la g’à?”
- La me amica la s’à ‘rabià
- e da cativa la g’à ‘baià!
- DINO BARBIERI, LEGNAGO
- DINO
- dedicata a Santo Dino Coltro
- Lezo el to nome, Dino, curto e suto
- come la tera remenà ’n tel canpo
- de tuti i libri sacri che t’è scrito,
- quan’ t’eri vivo e te savéi de tuto
- chel mondo contadin che ti te amavi
- insieme a le raìse de i to cari.
- Ma el fójo piassè belo che no móre
- l’è tuta la passion che te ghè messo
- nel ricordar la storia de ci gh’era
- su i canpi, ne le stale e le contrade,
- a sfadigar col sangoe e col sudore
- da quan’ levava el sol e fin a sèra
- par far contenti tuti chei paroni
- che pretendéa guadagni sora i stenti.
- Ligà a sta zente ne i filò de corte
- ghè stà el dialeto, spece quelo orale,
- che t’è servìo da altare par pregare
- chel Dio che ‘desso t’à volùo dessora,
- ciamàndote nel brolo de ci vive
- el premio merità qua so sta tera.
- LUCIA BELTRAME MENINI, VERONA
- OZE DE TERA
- No l’è par nostalgia
- che on bresparo de oze me sconbate
- soto la pèrgola de i giorni
- che me resta.
- Vorìa sentire almanco verso sera
- quela che on dì
- m’à roversà ‘nte ‘l brolo de la vita.
- E vago a remenar la tera nuda
- e sento tra le man ‘l so baticore,
- la sé che la tormenta quan’no piove,
- el strin che la careza e la sfarina.
- In mezo ai dièi s’ingruma
- on mare de pestade
- incatejè co i sloti :
- oze de passi vegri, quasi salveghi,
- intabarè de sogni sognè in pressia,
- inbonbeghè de salti, scriolte e rebaltoni,
- po’ scancelè par senpre insieme ai ani.
- Vorìa che te savessi, tera cara,
- quanto che m’è costà nar via dal gnaro:
- catarme pene e paje forestiere
- par no morir de stenti e de fadighe.
- ’Desso te baso e strenzo sora ‘l pèto
- come se fusse l’ùltima me sera.
- LUCIA BELTRAME MENINI, VERONA
- SENZA LUNA
- No gh’era
- la luna che splendea
- chela sera!…
- Me son ciapà
- el cor in man,
- par farghe ‘na carezza.
- Però, me son incorto,
- che proprio soto, l’era roto…
- Con la paura adosso
- me son guardà intorno,
- par zercar gucia e fil
- e pezarlo on poco.
- No g’ò catà
- gnanca ‘na spoletta
- e de guce, gnanca l’aria!…
- Con l’anima che tremava,
- come ‘na foja
- al vento d’autuno,
- m’è cascà ogni speranza…
- El tempo el m’avea robà
- tuto quel che me servea,
- e me sentea nudo,
- in mezo a ‘na bufera
- che m’ingizava fin ai ossi!
- No gh’era la luna
- che impizava el cel
- chela sera!…
- Anca se esse catà
- gucia e fil,
- no’ g’avaria podesto vedar!
- MARIO BISSOLI, GAZZO VERONESE
- LADRO
- No’ ò mia dormì
- ‘stanote!
- Pian pianelo
- son sbrisià via
- dai brazi de Morfeo,
- e senza essar visto,
- son ‘ndà a des-ciodar
- le stele, pusè bele
- che gh’era in cel!
- Con man lezera
- come ‘na piuma,
- i-ò tacade al sofito
- del to’ cor,
- con nastri de raso,
- robadi a la me anima.
- Così, quando
- ne le sere senza luna
- gira nioloni scuri,
- le te s-ciara la strada,
- e te pol rivar in porto
- senza paura.
- MARIO BISSOLI, GAZZO VERONESE
- ME BUTO TE L’AQUA SCURA DE LA ME VITA
- Me buto te l’aqua scura de la me vita,
- parché me vegna in mente i ricordi:
- “Dove sòia?”
- “Tuto incorà a sò!”
- A nóo drio a la riva pien de antarine verde
- a vedo un vecio con un capelo fracà in testa,
- che’l tira sù da la fossa granda ‘na mota de antarìne.
- ‘Na zoveneta la ‘riva tuta alegra,
- un s-ciapo de ochi la se porta drìo,
- i taca a impinirse de antarìne
- da farse s-ciopare el fegato.
- Stufa, la vole ‘ndare via,
- la tàca piciarli con ‘na bachéta,
- el più cativo el ghe core drìo,
- la ghe mola ‘na sves-cià con l’aria fis-cia,
- no la ghe ciàpa el colo, el se storza tuto in sbiego!
- “E adesso?
- Me mama, se la o vede la me gonfia, cossa faia?
- Vieni belo, vieni, mostrame, fame védare el colo!”
- Fermo, intronà l’oco con l’ocio la varda,
- la ghe ciapa el colo, la ghe dà on tiron,
- e lo indrizza, drito el ghe resta!!
- Sbiasicando ‘na meza canzon la parte
- co ‘l so’ s-ciapo de ochi tuta alegra.
- A me mama nel 1946
- MAURIZIO BONFANTE, LEGNAGO
- DA ZOVANE CON ME AMIGO
- Da zovane con on me amigo
- andasevino in fondo al saver
- a se perdevino in question difizili
- ca ne fasea vegnere i brividi.
- A vegnea fora de tuto
- a imissiavino Poper, Froid,
- ciapavino Bibia e From
- ‘na ventà de Esse
- el cor el se inteneriva.
- Neruda no lo tradiva.
- I g’era autori duri da mastegare
- de le piere
- ma noaltri do gerino cussì bravi
- ca ne vegnea el magon.
- Secion, mì, mai stà,
- ma intortejarse fin a le do, anca tre de note
- come me piaséa!
- Smontà da la machina,
- i oci al celo i tintonava,
- in quelo ca vedea par aria,
- un campo somenà a spajo de brilanti,
- butà là in ogni canton fin dove i oci i se tendea.
- A cuciavo le spale pien de meraveja.
- A ghea capìo che no ghea capio gnente.
- MAURIZIO BONFANTE, LEGNAGO
- VENTESEL DE PRIMAVERA
- Dindonàr de piopi
- longo la stradéla:
- sona come chitare
- rame al vento.
- Scampanèla le foje
- ransignè dal fredo…
- Carobole de rubinàr
- intona el canto!
- Su l’alzaro…
- l’erba sbalesà
- revén!
- GIOVANNI BONINSEGNA,
- CASTEL D’AZZANO
- S-CIOCA
- S-cioca, s-cioca,
- s-cioca sol,
- fame grondar de sudor!
- No ‘mporta se me ven
- el sbiseghin ai oci,
- se panteso, se pianso.
- Mi so… che te m’è dato
- el carburo
- par tirar avanti.
- GIOVANNI BONINSEGNA,
- CASTEL D’AZZANO
- POARETI PIE’
- Poareti piè…ormai si’ malà.
- Oh!, quante peste sul mondo gavì lassà.
- Peste legere sul verde de on prà…
- Peste più forti so la sabia del mar,
- peste insistenti so la vostra casa
- dove el lavoro sempre ciamava.
- Peste de atesa so ‘na porta sbacià
- a spetare qualcuno che no gh’è pì tornà…
- Poareti piè – piati e dolenti
- ormai deformà,
- nè sù ancora… in alto,
- sempre più in alto…
- De là de che ‘l monte trovè tante stele
- e ‘na via nova
- che afani più no ve dà!
- FRANCA BOVOLON, TERRAZZO
- T’HO ZERCA’
- T’ò zercà ne le sere longhe
- de l’autuno,
- nei giorni tristi e grisi de l’inverno.
- A piè descalzi so la sabia
- col frussìo de le onde,
- longo la riva del mar
- t’ò zercà…
- …on gabian solitario m’à risposto.
- In mezo a le montagne
- g’ò ciamà…
- ma g’ò sentìo solo
- l’eco de la me voze straca.
- T’ò zercà tra la gente
- ma g’ò visto solo indifarenza.
- Ne la foresta de la memoria
- t’ò zercà e… drento al core
- t’ò trovà.
- FRANCA BOVOLON, TERRAZZO
- ANGELI IN PURGATORIO
- Tanti Dotori i gà fato la Storia
- par fati eroici da tempi passà,
- anca par lori ghè tuto cambià,
- iutè dal computer i gà manco gloria.
- Ogni dotor, gran zervelo, ‘na scienza,
- ma i ga da portare tanta passienza.
- Se cambia el Goèrno a Roma o in Region
- i fa nove regole, Ministri e Assessori,
- e i ga da ‘giornarse sempre i Dotori
- par no sbaliarse e far confusion.
- Tra regole nove e vece magagne
- le so jornade i-è tute compagne.
- In ambulatorio, tra zóeni e vece,
- ghe n’è sempre tanti che va e che ven,
- ne la stajon freda ghè sempre pien
- par mile rizète de ogni spece
- e in ḉerti giorni e coesto l’è vera,
- no’ i vede l’ora che ‘riva la sera!
- Par i Dotori la vita l’è dura,
- oltre ai pazienti da mantegnèr sani,
- i gà da curarse anca lori i malani,
- de far coalche sbalio i gà gran paura.
- Tra visite fora e in ambulatorio
- i Dotori i-è… Angeli in purgatorio.
- Ma se in purgatorio vive i Dotori,
- noantri, Anziani e mal pensionà,
- soto la mira de la Sanità,
- vivemo a l’inferno, pezo de lori.
- Pensèghe sora e tirè la morale:
- tra lori e noantri cì stà piassè male?
- NANDO CALTRAN, LEGNAGO
- ‘NA SOTILA DISTINZION
- La memoria me porta buteléto
- coando a tola spetàino el magnare,
- no gh’èra da zernìre o da sgognare,
- ma fete de polenta e el pocèto,
- ‘na càzza de acoa e dopo in leto,
- coanta fame n’à fato tribolare
- l’èssar pitochi e no saver ‘sa crompare.
- Me ricordo ‘na frase in dialeto
- sul poaréto tratà compagno on òco,
- la so’ vita la gera ‘na passion,
- par “fortuna” che… el campava poco!
- Se faséa ‘sta sotìla distinzion:
- che la fame la sente el pitòco,
- e l’apetito lo sente el paron!
- NANDO CALTRAN, LEGNAGO
- LA NOSTRA EMOZION
- Se ghe penso ben
- a non me pare gnanca vera,
- come l’acqua de on fiume
- la va verso al mare,
- ‘sto me pensiero
- el me fa oncora emozionare.
- La prima la se sà;
- l’è par i nostri genitori,
- come on seme
- che ne la sguazza del matin
- semo sbocià col calore del sole,
- mentre al scuro de la sera
- ghémo imparà a recitare
- la nostra prima preghiera.
- La scola no l’è mia da tuti,
- ma l’è lì… che semo conossùi /dopo l’asilo
- L’amicizia, le compagnie
- no le se pol certo desmentegare,
- anca se ‘desso ‘n ricordo
- scrito o fotografà dentro
- al nostro core, e resta lì…
- pronto par essare racontà
- o solitamente ricordà.
- Ognuno de noantri
- s’à fato el so’ sentiero,
- rispetando le cavezzagne
- dei nostri avi,
- che come spèci de vita
- i ne fa capire ‘l sacrifizio
- del valore de ‘na strada.
- Sora ‘l telaro del nostro doman
- stémo costruendo la nostra fameja,
- trategiando contorni de sagome
- colorà dal caldo sole d’istà,
- che solo el pensiero fredo d’inverno
- gà savù giazzàrli dentro
- a l’abecedario infinito.
- L’emozion l’è ‘na sensazion
- che la nasse dentro de noaltri,
- la te fa sognare e lo stesso tempo
- la te fa anca volare.
- Le se pol racontare come fiabe
- ai butini che dorme,
- scrivéndole come storie o raconti
- a la gente semplice che sà ‘scoltare
- la ozze muta del gnente.
- In un dipinto a ojo spighe dorà
- in smissià dai rossi papaveri,
- l’inocensa del primo baso
- ‘compagnà da la melodia celestiale,
- che solo i nostri genitori
- i gà savù realizzare ‘l loro dì pì belo:
- “la nostra esistenza”.
- NICOLA CHINAGLIA, VILLA BARTOLOMEA
- A SPASSO
- Cavéi bianchi tuti du,
- magari co ‘l baston,
- a brazzéto opur par man,
- senza pressia, a spasso i va
- contàndossela senza idee contrariàr.
- Da quaranta, zinquant’ani insieme,
- par capirse basta ‘n’ocià;
- i se vol un ben vero
- senza pì bisogno de dìrselo.
- I-è guardo
- con la me uda solitudine
- e… ‘na ponta de rabia,
- ma… tra mì e mì
- con la tenerezza del cor ghe digo:
- “Fin che Signor ve lassa
- stè sempre insieme;
- dopo… la vita se trasforma
- in un gnente senza senso”.
- TERESA DONATELLI, ISOLA RIZZA
- PROFONDA MUSICA DE SILENZI
- Me piase far poesia
- quando ‘n’emozion sgorga dal cor.
- Me piase recitàr
- e ‘scoltar i amici del Club
- tra sentimenti e ricordi
- da musica e canto intervalè.
- Me piase far concorsi
- e… ogni tanto
- su treni ramengóni
- córar su e zó par l’Italia
- a ritiràr un merito de sodisfazión.
- Poesia-conpagnia-
- ‘na sbrancà de serén
- a la vita mia;
- lezéro volo de gabiàn,
- profonda musica de silenzi.
- Poesia – sorgente de tranquillo –
- dóneme senpre ‘n’idea d’artista
- e … ch’el me animo
- mai resta arido
- de realtà e fantasia
- da inprimàr su bianco fojo.
- TERESA DONATELLI, ISOLA RIZZA
- LA RETE DEL LETO
- A m’è stà regalà ona rete,
- gavéa cambià ‘l materasso,
- quelo novo l’èra on portento,
- quela invezze on vero spegazzo.
- La gavéa quatro gambe postizze,
- tute quante le jèra a incastro
- e par quanto te le smarteléssi,
- quasi sempre le jèra on disastro.
- M’ò svejà ‘na matina a le quatro,
- quele ai piè le s’avèa cucià,
- me so catà in piè su l’atenti
- e da ‘l spaento co i oci sbarà.
- Mosè quando ‘l pregava ‘l Signore,
- l’èra sempre co i brazzi alzà
- e mì invezze, magari ruzando,
- naséa spesso a gambe levà.
- ‘Na Domìnica dopo disnà,
- l’èra el giorno del me compleano,
- s’à cucià po’ le gambe davanti,
- g’ò ciapà on pizzegon al deretano.
- Doman cambio de colpo la rete
- e g’ò da védarla mì, co i me oci,
- che par caso no casca de novo
- e me pela anca i zenòci.
- ACHILLE FRAMEGLIA, LEGNAGO
- CASTAGNE E MARONI (CONSERVA’)
- Co ‘na padela a busi,
- la j-à ben brustolà
- … messi drento ai vasi
- e po’ tindalizà.
- Quarantazinque primi
- e on dì par ben ponsàr,
- cossì par ben tre olte;
- po’ in cantina par ‘spetàr,
- Che vegna i dì de Lujo
- par poderli ben gustare
- e fare ‘na sorpresa,
- a casa o in riva al mare.
- Butèi, sinceramente
- i pare apena coti,
- i se magna volentieri
- e po’… e po’… zó goti.
- ACHILLE FRAMEGLIA, LEGNAGO
- QUANDO ON GIORNO L’E’ TRISTE
- Tuto tase, anca el core.
- Tuto gh’è scuro, anca la luce.
- Tuto pare
- che no ghe sia pì continuazion.
- Le ore le va pian,
- ogni rumore diventa longo, odioso,
- el bàtare del core te strenze el peto.
- La vita la par cativa,
- senza pietà… te tole el respiro.
- A olte pare che ‘l celo te schizza,
- te stòfega co le nugole…
- ma l’è solo ‘na giornata de tristezza.
- ARIANNA FRATTINI, LEGNAGO
- NOTE DE ISTA’
- Note de stele
- contornà dal caldo
- e dai grili che canta in te ‘l prà.
- Co la facia
- verso el campo de gran
- penso che fo parte de ‘sto universo.
- El contato co la natura
- e le so creature
- me rende parte
- co ‘l core e co ‘l sangue…
- Tuto gira; la luna,
- la note, i me pensieri…
- e pianzo
- …da no poder
- vìvare par sempre.
- ARIANNA FRATTINI, LEGNAGO
- PRESINA
- Quando
- drento la casa de la me infanzia
- gh’èra ‘l respiro dei me cari
- che tegnéa su i muri,
- me parea on sogno,
- ‘na sagra vegner da tì…
- …caminare so le vece caezzàgne,
- védare ‘l me tempo,
- lèzare la me storia nata
- dal core de ‘na fola d’amore.
- Oncó quando vègno da tì
- te vardo co i oci del poeta
- o mèjo de la nostalgia …
- …jèro zóena, piena de sogni,
- qualchedun regalà da Morfeo
- che m’à fato lusingare,
- ma jè nà in zerùme,
- …dei venti maligni
- i-à supià ìa senza pietà!
- Oh, Presina, Presina,
- da tanto tempo ormai
- stò distante da tì,
- el zarmójo de quel che t’è restà
- el s’à quasi strinà,
- la lavagna dei me sogni
- l’è sempre piassè mora
- parché el zugo del destin
- gà fermà el respiro dei me cari.
- FRANCA ISOLAN RAMAZZOTTO, LEGNAGO
- NADALE
- Quanto zùcaro
- se spampàna
- a Nadale ….
- parchè
- solo a Nadale ?
- FRANCA ISOLAN RAMAZZOTTO, LEGNAGO
- A ROSE
- ‘Na vita s-ciopà
- So ‘na barela bastonà
- Rota … Insacà.
- ‘Na vita strussià
- Da l’Africa Te ‘rivài
- La fortuna Te zercài
- Cativa gente Te catài.
- ‘Na vita comprà
- Te voléa tanti schei
- No i ghe bastava mai.
- ‘Na vita vendua
- Trent’ani
- Tanti sogni
- Nome de un fiore
- Te gavéi.
- ‘Na vita brusà
- Nei oci cossa Te passa
- I ‘sti ultimi fià
- El paese…lassà,
- la fortuna…mai ‘rivà
- La To vita… robà!
- PAOLO LANZA, LEGNAGO
- LA ‘NITA E TONI
- Quando la bruma
- La piega le piante
- Ne le sere rabiose…
- Vizzin al fogo
- Fasendo la maja
- De la ‘Nita e Toni
- La storia Te ne contài.
- Partìi col vapore
- Par la Merica
- Con ‘na valisa de carton
- E tanti fagoti instrazzà
- “Chissà se jè ‘rivà…”
- “In che Merica jè nà…”
- “Come starài?…”
- I oci Te se slusegàva
- E noantri
- Da la finestra
- In mezo a le nebie patoche
- De vedare ne parea
- El vapore
- In Merica … ‘rivar.
- PAOLO LANZA, LEGNAGO
- E L’E’ PAR QUELA…
- Vecio de drento e de fora,
- straco ‘n te l’anema e ‘n te ‘l cor
- tristo e solo, ‘l camina de note
- par le strade quando pioe
- e l’è par quela che no ‘l se ferma,
- tanto no ‘l g’à pì gnente da perdar…
- da rancurar,
- l’indifarensa de ’l mondo
- la g’à scancelà speranse e sogni.
- Bate ‘l tempo ‘l so baston sora ‘l marciapiè
- contandoghe i passi.
- Intabarà de malinconia, ‘l sangiota a pian
- lagrime calde core zo da le ganasse
- smissiandose co’ gosse ingiassade
- insieme le sbrissia
- drento ‘n te le poce.
- Lagrime o piova?
- Ci ‘l lo varda, no i capisse, e no i sà
- …e l’è par quela che ìl và;
- sicuro che gnissun podarà dirghe:
- “Poro vecio, poro can”.
- ANNA MARIA LAVARINI, VERONA
- COLINE SLUSENTI
- L’aveimo ciapà ‘nsieme
- sensa pantesar la pontara,
- l’era lesero ‘l peso dei sogni,
- strada fasendo s’aveimo cargà
- de gioie, de crussi, de ani.
- L’è drio fenir la strada
- che porta a la ḉima,
- ‘na olta rivadi
- se cavaremo de dosso
- quel basto, che ne cuciàva le spale
- e lo lassaremo lì; par tera.
- Se te vegnarè con mi
- te portarò sora coline slusenti,
- libari da fadighe
- ciaparemo ‘nsieme
- ‘l senter de le stele,
- un senter de Luse, sensa fine.
- ANNA MARIA LAVARINI, VERONA
- MI GHE VOI BEN
- In quela bala imbriaga,
- che l’è ‘sto mondo
- pien de bale,
- la cosa piassè bela
- che ‘l podea far el Signor,
- iè stà… le done!
- A dir che ghe vói ben
- a le done no g’ò vargogna,
- parché, ghe vói ben a tute,
- che le sia bele
- o che le sia brute,
- zoene e vece,
- anca de mesa vigogna,
- basta che no le sia
- mese par sorte,
- no… quele no !
- E se ‘na dona sarpente,
- dopo che l’ò scaldà la me bechesse,
- e la me fasesse morir…
- …morir in gloria
- la sarea,
- la pì gran sodisfassion!
- GIUSEPPE LAVARINI, ISOLA RIZZA
- DRENTO ‘N CAPITEL
- Tanti ani che no passava da lì,
- no se vedea pì gnente,
- spinari e roéje te scondea Madona
- drento quel capitel là su i monti.
- Me ricordo de ani fa, quando s’éra picolo,
- che su l’altarin gh’éra sempre fiori freschi,
- e tanti lumini impissè.
- La gente che passava la se fermava davanti,
- i lesea quela frase che gh’éra scrito soto:
- “O passegger che passi per questa via
- scopriti il capo e dì l’ Ave Maria”.
- Co divossion i sbassava la testa
- e i disea la preghiera.
- Tanti i te dimandava anca la grassia,
- o ‘l miracolo che che la staion fusse bona,
- che ghe fusse pace ‘n fameja,
- che i omeni i ritornesse da la guera,
- che tuto ‘ndesse ben,
- i g’avéa de Ti tanto bisogno.
- Desso che fà miracoli e grassie,
- gh’è ‘n television maghi e striossi,
- e i piassè i ghe crede solo a quei,
- cossita anca de Tì e par el Cél
- no i g’à pì rispeto.
- No sta tórtela Madona,
- vegnarò ‘n giorno a libararte
- da i spinari e roeje, piantarò rosare,
- te portarò fiori, impissarò lumini,
- e quei che passarà, i farà da novo,
- un riverente pensier par Ti.
- GIUSEPPE LAVARINI, ISOLA RIZZA
- L’ULTIMA SPIAIA
- In deserti silenziosi
- gò inpinà l’anima de desideri
- ciapà el corajo a coatro man
- e messo l’avenire in scarsèla.
- Inbriagando el core de promesse
- me son inventà la vita,
- ma la vita, da chel momento,
- me gà vardà co oci strani,
- da foresto.
- se rancura nugole -
- Dopo el tenpo de le fole
- son tornà da novo a vivare
- ona vita senza frondoli,
- rancurando fregole de sogni
- cascà dal nastro de la memoria
- pien de ricordi.
- Xé tornà solo on rudere,
- on omo senza anema
- co i oci sol par pianzare
- a rancurare làgreme
- perse dal core al tramontar del sole
- so l’ultima spiaia ormai deserta,
- senza poder traversar
- da novo el mar
- e gnanca tornare indrìo.
- FRANCO CARLO LORENZETTO, MERLARA
- S-CIOCA SOLE, S-CIOCA!
- La xe ‘na sera freda,
- el vento maséna neve
- sora le case e par le strade.
- On vento che t’inpina i ossi,
- oncora coelo, de coando el core bujia
- so leto de scartozzi ‘nbriagà de amore.
- Seghita el batociar del core
- par i prà de la note
- e a inpizzarse de sole
- se palpa la voja de ripiturare ‘l dì
- coi toni de l’amore.
- Mile dì e pì xe passà
- da la promessa de senpre
- che gavea saor de eternità
- e no gò perso memoria de oci
- che vardava dreno i mii.
- La staion s’à messo in sen el sale,
- ma i ricordi xe rose co i spini
- drento al core.
- S-cioca sole, s-cioca,
- de l’inverno
- gò tante robe fruste da trar via…
- s-cioca sole, s-cioca
- chissà che torna farse viva la speranza.
- FRANCO CARLO LORENZETTO, MERLARA
- DEDICA A LA MAMA
- Cara Mama Celeste
- da ‘sta terena veste
- te vegno a pregare:
- voria dai to brazzi sentirme cunare.
- Spesso strenzo le man al vento
- parché vedo el mondo in tormento,
- Mama, mi te prego in zenocion
- scancela da tuti ‘sto magon.
- Mama, qualche volta te fo dispiazere
- quando distrata, no digo le preghiere,
- ma ti paziente e co afeto
- te me scusi, te me strenzi al to peto.
- Xe majo, la rossa rosa xe sbocià,
- la someja al to cor strazià
- par la morte cossì atroce
- de to Fiol, inciodà so la croce.
- Cara Mama, finisso ‘sta preghiera
- insieme a tute le mame de la tera,
- on canto te ofremo con fervore
- par dirte grazie del to grande amore!
- PASQUALINA MARIN, PRESSANA
- COLORI E CANTI MARZOLINI
- Da ‘na frescolina arieta
- tuto el cel xe spazzà,
- in on atimo tuto xe spuntà
- la tera de fior xe ricamà.
- Le timide violete su i prà
- le xe fiorìe a s-ciocarà,
- ghe fa da ricamo le margherite
- tra ciaciarar de passerete.
- El merlo fis-cia el so amor
- a la ciorla che beca l’erbeta
- ela lo ‘scolta co emozion
- in compagnia de ‘na farfaleta.
- Le zùrle xola tra le ale de moschini,
- la bissòrbola se scalda sol mureto,
- sol fosso la rana zuga co i girini,
- sui campi canta on grejeto.
- Magia de profumi fa fantasticar,
- i zentanìni grata la tera,
- so le pociare l’anareta va a noar:
- quanta gioia porta la Primavera.
- El pesco de rosa aureolà
- el par ‘na nuvola de seda vestìo,
- on galeto al sole gà cantà:
- ‘sta gran belezza ne gà donà Dio!
- PASQUALINA MARIN, PRESSANA
- PIOVE E SVENTA
- L’è istà. I canpi iè arsi, brusà,
- el caldo ‘l suga fossi e canai,
- i girasói i stenta a drio al sole,
- i paroni iè in tension e i spera…
- Atorno a le coatro de dopo disnà
- se scurisse el celo, a matina,
- e ‘na nugola la querze el sole.
- Se mete ch’el vento rabioso
- che alza le cotole, roba i capei,
- el pocia polvare da le strade
- incipriando tuto coanto a la man,
- mentre i albari e i prà i fa la ola.
- Dessora gh’è ‘na gran confusion,
- scuro bisso e sporcà de bianco,
- site, tonè che fa tremare i veri:
- tuti i core, el bastardin ‘l caina,
- le done ciama aiuto dai omeni;
- sventa assè e i primi gozzuti,
- smissià a grani de tenpesta fina,
- i vien zo de segheto slusegando:
- che fracasso sui copi e par tera!
- “Cissà che la se olta con quela bona!…”
- Da lì poco, piove che l’è on piasere
- e a tuti se verze el core e i biassa:
- “Manco mal che la ne nà ben,
- tiremo ‘l fià par n’altro tochetin”.
- GIOVANNI ROCCO MASTELLA, LEGNAGO
- ‘NA CUNA ROSA
- Son ancora inpisocà,
- stento a verzare i oci.
- Son in on mondo estasià
- fato de pugneti sarà,
- testoline bionde, more:
- iè tuti butini bei, carini,
- gh’è anca la me neodina.
- Verzo la porta magica:
- on fagotin el se destira
- in te ‘na cuna tuta rosa,
- la boca par che la ciucia.
- Coi goanti bianchi,
- i oci coerti de paje d’argento,
- ciapo ‘sta opera d’arte
- e portandola sul core,
- come on’orazion,
- ghe conto ‘na fola
- e la coerzo de baseti.
- Pianin la verze i oceti
- e s-olo in on mondo
- in do’ piovarà par Ela
- i colori de mile primavere:
- i sogni del Nonno.
- GIOVANNI ROCCO MASTELLA, LEGNAGO
- EL SCARPAIO
- On mestiere
- Ormai raro
- Cuoi, pele,
- Cola, spago.
- Broche de qualità,
- ‘Na machina de qua
- E una de là
- E la scarpa
- L’è giustà.
- El te slonga
- La cinghia
- El te mete el tachéto
- El ghe cambia colore
- Al to sandaleto.
- E par contentarte
- El fa de più;
- A la to borsa bianca
- El ghe dà el blù.
- Dunque,
- Dal to artista scarpàro
- Cosa vuto de più?
- Tièntelo caro, parché…
- No ghe n’è più!
- MITES PARLADORE, MINERBE
- ANGUANE
- Abitatrici de l’acqua
- E dei boschi.
- El mistero de le Anguane
- Bele come sirene
- O brute e vece
- Come befane.
- Le vive en te l’acqua
- Le gira en te i boschi
- Lore le te vede
- E tì gnanca
- Te le conossi.
- Le fa dispeti
- A gnomi e foleti
- Le strùssia i funghi
- Le pesta i fioreti
- Parché anca lore
- Le vorìa zugare
- Ma contro de lori
- Non gh’è gnente
- Da fare.
- Alora par calmare
- ‘Sta baraonda
- Dal celo ‘riva vento
- Fulmini e tempesta,
- Così nel bosco vien
- Spazzà via ‘sta strana e
- Intrigante magia.
- MITES PARLADORE, MINERBE
- GREI CANTERINI
- Grei canterini v’ò sentìo in magica sera stelata.
- Ve pensavo distruti, dispersi, spariti dal bel prato
- fiorìo e profumà da tante varie erbe.
- El vostro rifugio no ‘l gh’è più; al so’ posto
- gran busa, po’, do vile grande e siore
- par l’ambizion de’ omeni che i-à vossù.
- Par magia, non so quale, improvvisi si’ ‘rivà
- in altro logo sicuro e fresco.
- Risento cantare nel boscheto vicin:
- crì… crì… crì… me ciapa
- on’emozion granda: eco, de novo ghe si’.
- La vostra musica me dise: la forza
- de la natura, la forza de la vita che
- vinze anca i dani fati da noaltri
- pòri “Cristi!”
- LICIA PESENTE, TERRAZZO
- TRISTEZZE E SPERANZE
- La campagna a l’è malà,
- colture e giardini desfà.
- Tempo balordo:
- piova a sece roèrse, salà,
- massa caldo da sofegar
- o umido a volontà.
- El tempo a l’è bislaco:
- fiori d’inverno, foje seche d’istà,
- giardini e gente inocà…
- Com’ela, come no ela?!
- Machine che vola, che core,
- sempre de pì bauli grandi,
- polvare che se soleva,
- gas a volontà che fa mal.
- Piase la gran velocità,
- piase la grandiosità,
- piase garegiar…
- Robe assè se compra e…
- Alè…se buta in gran mùcio,
- nessun sa pì cossa farne.
- L’aria de schifo
- deventa profumà.
- Speremo che possa cambiar…
- ne manca on poca de volontà.
- La vita ne dise de far de mejo.
- Sempre dovemo sperar..
- LICIA PESENTE, TERRAZZO
- L’ULTIMA STAION
- Eco, l’autuno l’è ‘rivà,
- l’è la staion pì bela de la vita,
- quela… de la terza età!
- Prima che la nebia la querza tuto intorno,
- voi impinìrme i oci dei colori del mondo,
- del rosso e zalo de le foje brusà,
- de le mace viola dei fiori settembrini,
- voi impinìrme el naso…
- del profumo dei maroni brustolà
- e del mosto che boje dentro i tini.
- Voi scondarme dedrio un zugo de luce,
- e in tel silenzio, quel che me dà pace,
- vardar le nugole con le so tante forme,
- che a olte, me par bianchi cavai,
- che al galopo i core verso el mare,
- lassando indrìo solo ‘na sia de polvare
- e a la me vista pian pianin, tuto scompare.
- Ma eco… me inpisoco…
- E sogno ‘na nova primavera,
- gh’è n’angelo che me presta le so ale
- e con amor da tera el me soleva
- par insegnarme… come se fa volare.
- SILVANA PICCHI, MINERBE
- RICORDI IN BIANCO E NERO
- “ ‘Na domenega triste come tante
- son mi sola in te ‘sta casa massa grande,
- in cel el sol che stà par tramontare,
- se rosega pianin tute le ore,
- la mente alora, scomizia a ricordare.”
- Vedo el film de la me vita…
- in bianco e nero,
- quando butina sui zenoci de me nono,
- par scaldarme me scondéa soto el tabaro,
- davanti a un camin…
- senza ramina… e senza fogo.
- Sula tola ‘na lanternina a oio,
- faséa ciaro a ‘na veceta rapolà,
- me nona Rosa la disbrojava in casa,
- l’èra picinina che la parea inzenocià.
- Ma quando ‘rivava primavera
- e le piante metéa el vestito de la festa,
- scapava discalza sui sloti ne la tera,
- parché alora, scarpe no ghe n’èra.
- Passava cussì i più bei giorni di me ani,
- e vegnéa l’inverno ancora coi so’ dani,
- no gh’èra legna par scaldarse
- e poco o gnente da magnare,
- ma in tel cor tanta speranza,
- che un doman, la podea cambiare.
- ‘Na matina de genaro me son svejà,
- al sóno fondo de la vecia campana,
- con le onge dai veri gò gratà la bruma,
- gò visto ‘na sagoma che se ‘lontanava,
- l’èra un careto tirà da du cavai…
- con me nono, che me ‘bandonava…
- Sul sentiero che la neve avéa scancelà,
- restava solo el segno… de do carezà…
- SILVANA PICCHI, MINERBE
- VIAJO NEL TENPO
- Rumando in granaro gò catà
- ‘na machinéta de lata
- bela colorìa, sportiva e ben fata.
- L’ ho strenzù nel cór
- e son de corsa partìo
- de tanti ani indrio.
- I me amizzi jèra oncora là
- indove li gavéa lassà:
- nel castel d’i sogni
- mai desmentegà.
- Ciao Berto! Ciao Rina!
- Ciao Toni! Ciao Mora!
- A semo dito: “Cossa femo
- chi fermi a vardarse?
- Dai che nemo!” Cossita
- in tanti bei posti semo nà,
- insieme come ‘na volta,
- a ramengo qua e là.
- Ghemo in strada zugà,
- anca el stradin fato danar,
- in t’i fossi pescà e noà
- e tante ànare spaventà,
- la lota fato in t’i prà
- e tante marmore rodolà.
- Parìvino pulirei mai chietà.
- Sol pì belo che me godéa
- la benzina gò finìa, de volta
- son tornà; jera proprio sidià
- e tuto suà. El segon tirava
- …massa stajon jera passà.
- SERGIO POLO, TERRAZZO
- TENPI D’EROI
- Tirà fora da l’armaro d’i ricordi
- gò ‘na cartèla de carton fruà.
- Sarando i oci m’è saltà
- banpe de veci ricordi.
- In amente m’è vegnù
- de le me guere, fate
- par liberare ani picinini
- che grandi voléa deventar.
- Alora el tenpo jera d’i ani
- che tuti jerino eroi.
- Eroi de ‘na guera butina
- quando le bonbe jera
- le pigne d’i pini, s-ciopi
- e pistole jera de legno,
- le palótole de astichi,
- ‘reoplani de carta
- e medaje de carton.
- Quante batalie… A l’ataco!”
- A cavàl de spazaore,
- el mondo jera nostro.
- Guere d’eroi che mai moréa
- e de morti senpre vivi.
- Guere d’eroi che nissun perdéa,
- ma senpre tuti vinzéa.
- Cossì reduci semo tornà,
- tuti sani e gnanca costipà…
- altre guere ne spetava,
- guere che magna chi le fa,
- a tuti le dise:
- “Che vinzì o che perdì,
- a triste memorie passarè
- la vita incadenà”.
- SERGIO POLO, TERRAZZO
- SOTO ‘STO CELO
- Quanto dolore soto ‘sto celo,
- quanti oci de pianto e disperazion,
- gh’è tante busìe, gh’è pien de trame,
- par i poareti no cambia mai gnente
- gh’è ancora gente che more de fame.
- Intorno gh’è on’aria de ipocrisia,
- no gh’è rispeto par l’altro pensiero,
- in nome del ben i fa anca la guera,
- gh’è massa dolore soto ‘sto celo,
- l’è impastà de sangue la nostra tera.
- No vedo el perfeto soto ‘sto teto,
- soto ‘sto manto no gh’è giustizia,
- l’è stofegà dai schei e l’amicizia,
- gh’è chi porta tanto, drento la casa,
- altri i resta con gnente in mezo ‘na strada.
- Però, quando te riessi a girare la testa
- da tanto dolore e difarenza,
- te vedi sempre spuntare on fiore,
- gh’è oncora speranza soto ‘sto celo,
- parché gh’è gente che somena amore.
- LUCIANA SBAMBATO, LEGNAGO
- LUCE DE STELE
- Stasera nel celo gh’è massa stele
- che curiose le spia chi so ‘sta tera…
- magari me sbalio, iè sempre quele,
- ma tuta ‘sta luce me fa anca fastidio,
- parché la ferisse el me tristo viso.
- Stasera ne l’aria gh’è on strano canto
- che el gira intorno al me pensare,
- non sento calore drento ‘sto manto,
- el me core continua on lamento versare.
- Par ‘sti oci de pianto vo in zerca del scuro,
- zerco la pace e me cato on muro,
- ma de colpo gò voja de ‘sta luce guardare,
- m’è ‘rivà a la mente on grande pensiero,
- …mì, ‘desso, gò la me stela che brila nel celo.
- LUCIANA SBAMPATO, LEGNAGO
- 1935
- Prima de la guera tanti ani fa,
- ghe èra on omo chel se daséa sempre da far
- par la faméja, parché i jèra tanto pitòchi,
- cussì tuti i giorni el naséa par fossi.
- L’èra on zestàro, el zercàva piume e carezza
- par far spazzaóre e impajar la fiascheta,
- carèghe, zestèi, l’èra bon far de tuto,
- ‘rivava la sera che l’èra distruto,
- ma tuto el faséa par el bisogno
- e mai el se lumentàva chel pòro omo.
- ‘Na sera tornando che ghe èra zà scuro,
- el caminava drìo la Sarèga
- e no l’èra tanto sicuro;
- el gà messo on piè male, cussì l’è sbrissià
- drento so l’àcoa e lì el gh’è restà.
- Nessùn gà sentìo, nessun che gà visto,
- nessùn lo gà iutà chel poro cristo,
- col ciaro del giorno da la corente portà
- i lo gà visto passare coi brazzi spalancà.
- Chel pòro omo in Sarèga catà,
- l’èra me nono che no gò conossesto,
- ma sentìo tanto parlar.
- MARGHERITA LILIANA SOAVE
- RONCO ALL’ADIGE
- BUTINA
- Quanta nostalgia gò de chel tempo…
- Me ricordo le giornade de istà
- col sol che brusàva,
- el gran desteso sol sélese,
- mì ghe caminava inzìma a piè descalzi,
- me opà che l’osava parché lo strazzàva tuto.
- Me ricordo
- la puéta de pezza che m’à fato me nona,
- le corse so l’àlzare,
- l’àcoa de l’Adase
- che me rinfrescava quando jèra tuta suà,
- i salti co la corda,
- le corse par zugar bandiera,
- le rampegàde sóra le piante de more.
- Me ricordo
- de inverno quando nevegàva;
- metéa sù le trapole
- par ciapar le passarete,
- zugàva co le bale de neve,
- slissiava sui fossi ingiazzè,
- faséa chilometri a piè par nar a scóla
- co ‘na busta de carton, le sgiavaréte ai piè
- e on grumbialoto moro, sliso.
- Me ricordo…
- tuto me ricordo de alora.
- Anca se la vita l’è passà,
- el ricordo sempre vivo gh’è restà.
- MARGHERITA LILIANA SOAVE,
- RONCO ALL’ADIGE
- MAMA
- Mama, parché m’èto lassà?
- Sui me oci gò sempre davanti
- el to’ volto… el to’ soriso…
- le to’ parole, sì anca
- la to tristezza – adesso?
- Tuto vive drento de mì.
- T’ò visto gioire, ma…
- anca sofrire, mama…
- parché m’èto lassà, sì lo so;
- Gesù el t’à ciamà!
- Gò sempre bisogno de tì, però …
- so che dal celo
- te me stè a guardar.
- Mama,
- te prego, stame vizzin.
- So che te sarè a incontrarme
- a l’ora de la me morte.
- Mama, te raccomando,
- no stame ‘bandonar,
- ma t’ieme sempre par man.
- Mama, guarda sempre
- el to butin!
- SILVIO TEDESCO, ROVERCHIARA
- EL MATRIMONIO DE ‘NA OLTA
- Coanto l’era belo védar du giovani de sesso diverso
- che se vol ben, ‘na olta l’era cossì; a la sera
- i se incontrava, éla su la porta de casa la lo ‘spetava…
- e coando in bici el ‘rivava… eco, on sorisin,
- i oci i se guardava, e, con tanto afeto i se parlava
- e i tempi del matrimonio i progetava.
- El tempo el score veloce; i se marìda,
- ‘na gran festa, con parenti e amici e dopo?,
- lori du insieme i va a vìvar felici.
- La mogliettina a la sera con ansia la lo ‘spetava
- che ‘l tornasse dal laoro, eco, ancor un dolce sorisin,
- la verzea i brazzi scambiandose tanti afetuosi basìni.
- Pian pian nasse un fiolin, ‘na gran consolazion,
- ma… anca coalche preocupazion, le spese jè
- aumentà, co ‘l mensile l’è fadiga ‘rivar.
- I pensa come se pol far, i decide. El botin?…
- a l’asilo nido o da i noni, e anca ela
- a laorar par poder el lunario sbarcar.
- Ma… aimè! Adesso nei tempi moderni
- la s’à cambià, ben pochi i se vol maridar,
- i preferisse convìvar fin che la va, e dopo?
- Ognun par la so’ strada el se ne va.
- SILVIO TEDESCO, ROVERCHIARA
- LE TO MANE
- Le to mane, omo,
- impasta el mondo:
- ‘sfalto e cimento
- strossa la montagna,
- e, se a lustrar
- palassi
- con el marmo,
- l’è deventà nel tempo
- ‘na cucagna,
- s’à roto
- la susta a l’oroloio
- che gira note e giorno
- atorno al sol.
- No vedito che lì,
- tra piera e piera,
- un fil verdo e tenaro
- spunta solitario?
- No vedito come la vita taca,
- su ‘na fregola
- de tera che è restà?
- No sbregarla!
- Le to mane, omo,
- pol salvarla!
- MARIA TERESA VENTURI,
- CASTEL D’AZZANO
- INTONAME ‘NA CANTA
- Intòname ‘na canta de ‘na olta
- che possa riscoltar le nine nane
- su cune che dindola coi butini
- al lume de la luna che ris-ciara
- le sere pì rognose de la vita.
- Intòname ‘na canta de ‘na olta
- che possa spolvarar i me ricordi
- sora la sendra grisa dei pensieri
- che vol stofegarme le speranse
- e i desideri che me bala in sen.
- Intòname ‘na canta de ‘na olta
- che svéja angioleti che se ciàma
- con nugole de cieli ‘mboressadi
- de ale che se alsa da distante
- par rimirar la pace che voréa.
- Intòname ‘na canta de ‘na olta
- che possa colegarme come alora
- su caréghe a sgranàr i padrenostri…
- par arbinar la fede dei me veci
- e spampanarla sul mondo sfrantonà.
- Intòname ‘na canta…
- MARIA TERESA VENTURI,
- CASTEL D’AZZANO
- NEL BOSCHETTO DE VIA BIXIO
- In primavera e par tuta istà
- nemo a far i quatro passi
- e se catemo a le tre de ogni dì.
- Se sentemo soto i albari.
- Semo i vari novantenni
- che riesse caminar
- e se sentemo su le panchine
- o careghe qua e là.
- Se preferise taser e guardar
- ma a le volte se riesse
- a tacar qualche discorso
- e alora i ricordi i nasse.
- L’è belo sentir qualchedun
- contar de la so vita,
- de le traversìe capità
- ne i ani ormai passà.
- Te capissi quanto el mondo
- oramai el s’à cambià
- e noialtri semo ancora qua
- finché a Dio piasarà.
- Qualche volta insieme cantemo
- e un soriso esprimemo
- che ne fa gustar la vita
- fino a quando che campemo
- SANTE ZAMBONI, LEGNAGO
- EL TEATRO MIGNON
- Ormai da trentadù ani
- se incontremo in Aprile
- anziani de varie età
- a recitar le nostre cose.
- Sentemo tanti bei raconti
- e tanti fati de vita
- con tanta gente ne la sala
- che se gode a scoltar.
- ‘Na pianola e un cantante
- i ripete le canzoni
- che ognuno ben conosce
- e el ghe bate anca le man.
- Dopo, soto, gh’è el rinfresco
- e tuti i se gode a ciacolar
- e con el libreto ne le man
- se auguremo de catarse st’altro an.
- SANTE ZAMBONI, LEGNAGO
- RINGRAZIAMENTI
- A nome del Club si ringraziano per la realizzazione della serata le Ditte ed Enti elencati nel retro della copertina e Grafiche Marchesini.
- Un particolare ringraziamento:
- alla Cantante Luisella Rossin,
- al Tastierista e Cantante Gianpietro Gianfranco,
- alla Dott.ssa Maria Giovanna Cagalli e collaboratori
- della BiBlioteca Comunale Gervasio Bellinato,
- a Fiorello Stopazzolo,
- alla Prof.ssa Ivana Stopazzolo,
- ai Sacerdoti per gli annunci in Chiesa,
- al Mensile “Quatro Ciacoe”,
- ai periodici Sabato Affari,
- il Basso Adige,
- Legnago Informa,
- a tutto il pubblico che ci segue.
- Libretto curato da Franca Isolan Ramazzotto
- Serata organizzata da Franca Isolan Ramazzotto.
- INDICE
- 4-5 Dino Barbieri
- 6-7 Lucia Beltrame
- 8-9 Mario Bissoli
- 10-11 Maurizio Bonfante
- 12-13 Giovanni Boninsegna
- 14-15 Franca Bovolon
- 16-17 Nando Caltran
- 18-19 Nicola Chinaglia
- 20-21 Teresa Donatelli
- 22-23 Achille Frameglia
- 24-25 Arianna Frattini
- 26-27 Franca Isolan Ramazzotto
- 28-29 Paolo Lanza
- 30-31 Anna Maria Lavarini
- 32-33 Giuseppe Lavarini
- 34-35 Franco Carlo Lorenzetto
- 36-37 Pasqualina Marin
- 38-39 Giovanni Rocco Mastella
- 40-41 Mites Parladore
- 42-43 Licia Pesente
- 44-45 Silvana Picchi
- 46-47 Sergio Polo
- 48-49 Luciana Sbampato
- 48-49 Margherita Liliana Soave
- 50-51 Silvio Tedesco
- 52-53 Maria Teresa Venturi
- 56-57 Sante Zamboni
- Riello per la Cultura
